मुंबई: ईडी चौकशीचा नॅशनल हेराल्ड आर्थिक गैरव्यवहार प्रकरणी सलग चौथ्या दिवशी शुक्रवारी काँग्रेसचे माजी अध्यक्ष राहुल गांधी यांना सक्तवसुली संचालनालयाने (ईडी) चौकशीसाठी बोलावले आहे. यावरूनच काँग्रेस प्रवक्ते सचिन सावंत यांनी संताप व्यक्त करत केंद्र सरकारवर टीका केली आहे.
“राहुल गांधी यांना शुक्रवारी चौथ्या वेळी ED ने चौकशीला बोलवले आहे. मोदी सरकारने चौकशी करता येत नाही असे अडाणी व अकार्यक्षम अधिकारी नेमले आहेत का? मोदी सरकारच्या सूडाग्नीच्या ज्वाला शमत नाहीत हे स्पष्ट आहे. जगात अनेक शासकांनी अत्याचार केले पण लक्षात ठेवा ती साम्राज्ये टिकली नाहीत.”, अशी टीका सचिन सावंत यांनी ट्वीट करत केली आहे.
दरम्यान राहुल गांधींवरील कारवाईवरून कॉंग्रेसने आक्रमक भूमिका घेत देशभर मोर्चा काढत केंद्र सरकारचा निषेध केला आहे. महाराष्ट्रातही काँग्रेस प्रदेशाध्यक्ष नाना पटोले यांच्या अध्यक्षतेखाली मोर्चा काढण्यात आला आहे. मात्र भाजपने याला केंद्रीय यंत्रणेवर दबाव टाकण्यासाठी काँग्रेसची ही नीती असल्याची टीका केली आहे. त्यामुळे सध्या देशातील राजकीय वातावरण चांगलेच तापताना दिसून येत आहे.
