पक्षावर नाराज असलेले विदर्भातील भाजपचे दिग्गज नेते रविंद्र भोयर (छोटू) यांनी भाजपला रामराम ठोकला आहे. रविंद्र भोयर गेल्या काही दिवसांपासून भाजपवर नाराज होते. रविंद्र भोयर यांनी सोमवारी सकाळी भाजपच्या प्राथमिक सदस्यत्वाचा राजीनामा दिला. तसेच रविंद्र भोयर काँग्रेसमध्ये प्रवेश करणार आहेत. 34 वर्षांपासून भाजपसाठी झटत आलो. पण त्याच भाजपमध्ये माझा छळ करण्यात आला, मला दाबण्यात आल्यामुळेच पक्ष सोडण्याचा निर्णय घेतल्याचे भोयर यांनी सांगितले.
भोयर भाजपच्या प्राथमिक सदस्यत्वाचा राजीनामा दिल्यानंतर म्हणाले की, भाजपसोबत 34 वर्षे काम केले. तो पक्ष सोडताना मनात वेदना होत आहेत. पण दिवस-रात्र ज्या भाजपला वाढवण्यासाठी काम केले, अनेक नवीन लोकांना पक्षात आणले, त्याच भाजपमध्ये माझा छळ करण्यात आला. मला दाबण्यात आल्यामुळेच पक्ष सोडण्याचा निर्णय घेतला आहे. मी आजच काँग्रेसमध्ये प्रवेश करणार आहे. काँग्रेसकडून अद्यापही विधानपरिषदेच्या उमेदवारीसाठी कुठलाही शब्द देण्यात आलेला नसल्याचे भोयर यांनी सांगितले.
मी भाजपकडे विधान परिषदेची उमेदवारी मागितली होती. मला प्रत्येक वेळेला चंद्रशेखर बावनकुळे यांनी मी या निवडणुकीत उभा राहणार नसल्याचे सांगितले होते. पण नेमके उलट झाले. मला उमेदवारी नाकारण्यात आली. बावनकुळे यांना कामठी विधानसभा मतदारसंघातून उमेदवारी नाकारताना काय कारणे होती, की त्यांना उमेदवारी नाकारण्यात आली आणि आज ती सर्व कारणे नाहीशी झाली आहेत का? याचे स्पष्टीकरण भाजप नेतृत्वाने दिले पाहिजे. भाजपकडे या मतदारसंघात मोठी आघाडी असल्याचे म्हटले जाते. पण 14 डिसेंबरला मतमोजणी होताना भाजपकडे जेवढी आघाडी आहे तेवढ्याच मतांनी भाजप पराभूत झालेला पाहायला मिळेल. मला या निवडणुकीत भाजपमधील एक मोठा गट निश्चितपणे साथ देणार असल्याचेही भोयर म्हणाले.
