राज्य विधिमंडळाचे हिवाळी अधिवेशन कोरोनाच्या संभाव्य तिसऱ्या लाटेचे सावट, विधान परिषद निवडणूक आणि मुख्यमंत्री उद्धव ठाकरे यांच्यावर झालेल्या शस्त्रक्रियेमुळे लांबणीवर गेले आहे. येत्या डिसेंबर अखेरीस अधिवेशन होणार आहे. दरम्यान, हिवाळी अधिवेशन प्रथा-परंपरेप्रमाणे नागपूरला होत असते, परंतु मुख्यमंत्र्यांची तब्येत लक्षात घेता हे अधिवेशन मुंबईतच होण्याची चिन्हे आहेत. या आठवड्यात तसा निर्णय सरकार व प्रशासन घेणार आहे. विशेष म्हणजे नागपूरलाच अधिवेशन व्हावे यासाठी भाजप नेते आग्रही आहेत. तर दुसरीकडे मुंबईतच हे अधिवेशन व्हावे यासाठी शिवसेना, काँग्रेस, राष्ट्रवादी काँग्रेस आग्रही आहे.
विधिमंडळाच्या पावसाळी अधिवेशनाची जुलैमध्ये सांगता होताना हिवाळी अधिवेशन 7 डिसेंबर 2021 रोजी नागपूर येथे होईल, असे घोषित करण्यात आले होते. पण, नियोजित अधिवेशनाला 15 दिवसांचा कालावधी शिल्लक असताना अद्याप मंत्रालय पातळीवर अधिवेशनाच्या तयारीची हालचाल नाही. अधिवेशनाच्या महिनाभर आधी कामकाज सल्लागार समितीची बैठक होते. अधिवेशनाला जेमतेम 15 दिवस शिल्लक असताना सल्लागार समितीच्या बैठकीचा पत्ता नाही. तसेच शस्त्रक्रिया झाल्यानंतर मुख्यमंत्री ठाकरेंना डिस्चार्ज अद्याप मिळालेले नसल्यामुळे ही सगळी परिस्थिती पाहता महाविकास आघाडी सरकारच्या प्रमुख मंत्र्यांनी हे अधिवेशन मुंबईत घ्याव, असे एकमताने ठरवले आहे.
उपमुख्यमंत्री अजित पवार हे या आठवड्यात होणाऱ्या कॅबिनेट बैठकीमध्ये या हिवाळी अधिवेशनाचा प्रस्ताव बैठकी ठेवतील. यानंतर मुंबईत हे अधिवेशन व्हावे यावर चर्चा होणार आहे. याबाबत मिळालेल्या माहितीनुसार हिवाळी अधिवेशन 14 ते 24 , 17 ते 26 , 20 ते 29 डिसेंबर या कालावधीत घेण्यासाठी महाविकास आघाडी सरकार हे प्रस्ताव ठेवणार आहे. नये बैठकीनंतर कामकाज सल्लागार समितीची बैठक होईल आणि मग मुंबईतच या हिवाळी अधिवेशनाचा नियोजन करण्यात येईल.
