मुंबई :मनसे अध्यक्ष राज ठाकरे यांनी अयोध्या भेटीपूर्वी उत्तर भारतीयांची माफी मागावी नाहीतर त्यांना अयोध्येत येऊ देणार नाही, असा इशारा देणारे भाजपचे खासदार ब्रिजभूषण सिंह यांना उत्तर प्रदेशचे मुख्यमंत्री योगी आदित्यनाथ यांनी समज दिली असल्याचा दावा मनसेच्यावतीने करण्यात आला आहे. त्यामुळे राज ठाकरे अयोध्येला जाण्यामध्ये आता आम्हाला कोणाचाही अडसर नसल्याचे मनसेने म्हटले आहे.
उत्तर भारतीयांबाबत राज ठाकरे यांची विरोधी भूमिका आहे. त्यांनी हात जोडून उत्तर भारतीयांची माफी मागितल्याशिवाय त्यांना अयोध्येत पाय ठेवू देणार नाही, असा इशारा ब्रिजभूषण सिंह यांनी दिला होता. यावर मनसेचे नेते अभिजित पानसे यांनी मनसे लहानमोठ्या धमक्यांना भीक घालत नाही असे वक्तव्य केले होते.
ब्रिजभूषण सिंह यांनी प्रसिद्धीसाठी हा प्रकार केला आहे. मात्र त्यांना उत्तर प्रदेशचे मुख्यमंत्री योगी आदित्यनाथ यांचा फोन गेला असून त्यांना शांत बसायला सांगितले आहे. त्यामुळे बृजभूषण सिंह शांत राहतील असा दावा मनसेने केला आहे.
