जिल्हाधिकारी यांच्या आदेशाचे उल्लंघन केल्याने कीर्तनकार शिवलीला पाटील यांच्याविरोधात गुन्हा दाखल झाला आहे. शिवलीला पाटील या बिग बॉस मराठी सिझन ३ च्या माजी स्पर्धक आहेत. त्या कीर्तनासाठी आल्या होत्या. यावेळी प्रचंड गर्दी झाली. दुर्गा उत्सव मंडळाच्या पदाधिकाऱ्यांना हे आयोजन महागात पडले. याप्रकरणी तिघांविरुद्ध बुलडाणा पोलिसांनी गुन्हा नोंदविला आहे.
दरम्यान पाटील यांच्या कीर्तनास जिल्ह्यातील वारकरी संप्रदायाने विरोध दर्शवला. पण, आयोजकांनी आपल्या निर्णयावर ठाम राहत कीर्तनाचे आयोजन केले. पोलिस सूत्रांकडून मिळालेल्या माहितीनुसार, कोरोनाच्या पार्श्वभूमीवर जास्त गर्दी जमवू नये. असे आदेश बुलडाणा जिल्हाधिकारी यांनी दिले होते. देऊळगाव मही येथील राजमाता जिजाऊ दुर्गा मंडळ यांच्या वतीने पाटील यांचे कीर्तन आयोजित केले. यावेळी कीर्तनास २०० हून अधिक लोक जमले.
याबाबत पोलिस उपनिरीक्षक किरण खाडे यांनी सरकारतर्फे पोलिसात तक्रार दिली. मंडळाचे आयोजक संदीप राऊत, गणेश साहेबराव गोरे व किशोर पोफळकर (रा. देऊळगाव मही) यांच्याविरुद्ध गन्हा दाखल केला. जिल्हाधिकारी यांच्या आदेशाचे उल्लंघन केल्याप्रकरणी हा गुन्हा दाखल करण्यात आला.
