नांदेडात अज्ञातांकडून चारचाकी वाहन व दुकानांची तोडफोड
उत्तर त्रिपुरा येथील घटनेच्या निषेधार्थ आज मुस्लिम समाजाकडून बंदचे आवाहन करण्यात आले होते. या बंद दरम्यान काही समाजकंटकांनी शिवाजी नगर येथे चार चाकी, दुचाकी वाहनांची तोडफोड करत दुकानांवर दगडफेक केली.
त्रिपुरा येथे मंगळवारी विश्व हिंदू परिषदेकडून बांगलादेशात होत असलेल्या हिंदुंविरोधी हिंसाचार विरोधात एका रॅलीचं आयोजन करण्यात आले होतं. या रॅली दरम्यान तोडफोड केल्याची घटना घडली होती.
त्याच धर्तीवर सदरील घटनेचा निषेध म्हणून काही मुस्लिम संघटनांच्या वतीने आज भारत बंदचे आवाहन करण्यात आले होते. या बंद दरम्यान नांदेड शहरातील शिवाजी नगर, डॉक्टर लाईन, देगलुर नाका, फुले मार्केट आदी भागात युवकाकडून दुकाने बंद करण्यासाठी दगडफेक करण्यात आल्याची घटना घडली. घटना स्थळी पोलिस फौज दाखल झाली असून सदरील प्रकरणाची चौकशी पोलिस करत आहेत. या घटनेमुळे शिवाजीनगर परिसरात काहीकाळ तणावाचे वातावरण निर्माण झाले होते. या प्रकरणी अद्याप गुन्हा दाखल झाला नाही.
