पुणे येथील लोहगाव विमानतळावरील उड्डाणे 16 ऑक्टोबरपासून 15 दिवस बंद राहणार आहेत. ही उड्डाणे विमानतळाच्या धावपट्टीच्या कामासाठी बंद राहणार आहेत. विमानतळाच्या धावपट्टीच्या देखभाल दुरुस्तीचे काम हवाई दलाकडून सप्टेंबर 2020 मध्ये हाती घेण्यात आले होते. 16 ऑक्टोबरपासून या कामातील महत्त्वाचा टप्पा सुरू होणार असल्यामुळे 29 ऑक्टोबरपर्यंत विमानतळ पूर्णपणे बंद राहणार असल्याची माहिती विमानतळ प्रशासनाने दिली आहे.
फक्त 10 दिवस अगोदर लोहगाव विमानतळ बंद राहण्याची घोषणा प्रशासनाने सांगितल्यामुळे प्रवाशांची मोठी तारांबळ उडाली आहे. 16 ते 30 ऑक्टोबर दरम्यान तिकिट रिझर्वेशन केलेल्या प्रवाशांना या निर्णयाचा फटका बसणार आहे. यापूर्वी कोरोनामुळे लागलेल्या लॉकडाउनच्या काळात रात्रीची उड्डाणे बंद केल्यामुळे हजारो प्रवाशांना तिकिटे रद्द करावी लागली होती. आताही तिकिटे बुक केलेल्या प्रवाशांना तिकिट रिझर्वेशन रद्द करण्यास आणि त्याचा परतावा परत मिळवण्यास मोठी दमछाक करावी लागणार आहे.
