मतदारसंघातील विविध विकासकामे करण्यासाठी विधानसभा आणि विधान परिषद आमदारांना मिळणाऱ्या निधीत १ कोटी रुपयांची वाढ करण्यात आली आहे.
आमदारांना यापुढे आता ३ ऐवजी ४ कोटी रुपये विकास निधी मिळेल. आता मालामाल झालेल्या आमदारांनी किमान विकासकामाकडे लक्ष द्यावे.
जिल्हा वार्षिक योजनेतून लहान विकासकामांना कमी प्रमाणात निधी उपलब्ध होतो. या निधीतून शाळा खोल्या, अंगणवाडी केंद्र, व्यायामशाळा, स्मशानभूमी, शौचालये, कोल्हापूर पद्धतीचे लहान बंधारे बांधली जातात.लोकांच्या या गरजा पूर्ण करण्याकरता विधानसभा व विधान परिषद सदस्यांना २०११-१२ पासून स्थानिक विकास कार्यक्रमासाठी २ कोटी रुपये निधी देण्यात येत होता. पण बांधकाम व इतर साहित्याच्या दरात वाढ झाल्यामुळे तसेच वास्तूंची देखभाल व दुरुस्तीसाठी निधी कमी पडत असल्याचे पाहून २०२०-२१ मध्ये आमदार निधी ३ कोटी रूपये करण्यात आला होता.
